لمـّا سريت...

بـَ اسري لا سريت
و بـَ ارتحل في غيابك
بـَ ابتعد قد خطوتك
قد ما مشيت
حتى يتراوالي سرابك

و من هناك
بـَ ابدى الجديد
في دنيا غير
بـ ناس جداد
حتى الكلام
بـ يكون غير
و انتَ بعيد
خلـّك بعيد
و خلني أنا
أحيا الحياه
اللي معك
ما قد حييت


بس قبل ماامشي

خذ من بين كتبي
ماضي كتابك
و اخذ الصور
و كل المشاعر اللي بقت
و من ثوبي هاك العطر

و أبيك تدفنهم هنا
بـأخمص ترابك
و اكتب على سطح القبر
" عمر الهـَنا "


عمر الهنا
اللي ولا تحلم تعيشه
ولا هو درابك
و انتَ بعيد


ارضى بـقليل
و عيش الشقى
بـحال العليل
و لما ترد
تـِرجى اللقا
بـ اشوفك ذليل
و بـ اضحك و اقول:
" جد! شاللي جابك؟! "

أنا تراني
ألفين باب أقفلتهم
من بعد بابك



و على نفس الورقه
اللي على سطح القبر
ضِـيف على " عمر الهَـنا "
إني أنا
" زهوة جنابك "
انولدت بـموت عمرك
عمر القهر
عمر السهر

انولدت يومك سريت
و زان كل شي بذهابك


قلت لك
كل شي جديد
و انت ماضي الأمس
ماضٍ بعيد

و إذا عليك
الأمر التبس

أرجع و أعيد


عن جد..
شاللي جابك؟!

شتبي أكثر؟

ياليل شتبي أكثر؟
كفاية كل يوم أسهر

مع بدرك يجاملني
و انا بدري مشاغلني


نخيتك لا تييني الحين
... ولا بعدين

طلبتك كان تغليني
ياليل.. لا تييني

يا ليل بس شوي وقـّف
جذي مرتاحة لو تعرف


نهاري اليوم غير يالليل
تلاقينا بـنفس الميل


أنا ويـّاه جـِمعنا نور
سوادك ما رِضالي غرور


ظلامك لطـّخ أعماقي
هـَنا فـ البال.. ما باقي


عتامك ما رحم شوفي
يبي خوفي
... يخاويني


جمودك كسّر أهشاشي
كفى بـالله.. يكسّرني

يهمـّشني و يهشّمني


رضيت بـ طيب أشماسه
تليّـنـّي بـحنية
قبل لا فيه.. تصهرني


لأني...




تعبت أمشي على ميـْلك
مع خيـْلك
.... يوجـّهني



يضلني ما يدليني
.. على وينه!

ما خيـْل اليوم بـيحـْملني
.. سوى عينه


على ما تامر إهي أمشي
ولا أهتم
أدل ولا معاها اضل
مع هذا.. أنا بـمشي




تعبت القافية و الوزن
تعبت كل عادة و تقليد


تمرّدت على ضيمك
و على جفوة موازينك

أبـلعن كل قوانينك
و لا همني كل مجنون
يمشـّيني بـعناوينك




ياليل أرجوك لا تبخل
نهاري اليوم هو بس غير


حشا والله ما جسته
و لا منه أبد قرّبت
في قلبي بس أنا بسته..

و في عيني
و في عينه
و عين الشمس

و عين الناس
.... اللي مارحمتنا خز


ولا شيطان ثالثنا!
بس شويّة من شرور النفس



ياليل..خلّه بس شوي
ليلي.. ما شبعت الضي


ياليل شتبي أكثر؟
كفاية كل يوم أسهر

مردّي برجع لـمُرّك
و مع بدرك بـ ارد أسهر

يجاملني

و انا بدري..
ينام ليله
ولا فيني
رضى يدري



ياليل شتبي أكثر؟
ماكفاك كل يوم أسهر!؟

مع بدرك يجاملني
و انا بدري مشاغلني



عفيا شتبي أكثر؟!

صباح خير ويهك

يمر لك خيال
لما اتذكرك
و كل ما يمر
يلقاني مستبشرة


اذكره مثل ما أذكرك
طيب حنون
كله حياه
دمه خفيف
أفز
كلما اذكره




ماعرفني إلا و انا
أضحك معه
أطمنه
و اتطمّنه
و بـخير حالي
أخبّره


أحضنه قبل استودعه
حتى إلى مر لي خيال
بخاطرك
يستعطره




ياليت يوم هذا الخيال
لجلي يحن
يصير أكثر من خيال
واقع أبيه
كل يوم فيه
وياي يعيش
و احضره




و كلما عيني
تصحى
على نور ويهك
إيدي من الفرحة تلمسه
و بالخير
تبشّره

يا صبح ويهك
يا مساه
يا زينه
و يا محلا سِماه

ماقدر أخش
إني اعشقه
ويه كل خير

إعذر لساني
لي غزل
لي حكى
و ما شي غفل
عن زين ويهك
...تكفا اعذره


روح يالخيال
و قول له
إني بخير
و كل أخباري
إني بـاصبره

أحسب له كل صبحٍ و ليل
بس هو كأن
بالغياب
حيل زادت أشهره


راح أنطره
مهما ألتهى
في دنيته
بـيرجع و يلاقي
كل مكانٍ
في مكانه
مثلي ينطره...