مبارك عليكم الشهر ...

وعساكم من عواده

كِسيــرة

تذكر يوم انا شفتك؟
صغيره كنت وانت صغير
تخزني حيل وانا بعيد

شقاوة عمري خلتني
اساسر مي بدون احساس:
" يزينه هاللي يم نايف.. (: .. تعرفينه؟"
تضحك مي:
" يالخبله والله ان حس....."
اقاطعها:" زين عاد بس!! "

ارد صوبه
التفت.. ألاقيه يبتسم,,
يسوي روحه مو مهتم

درى فيني اهتميت
درى قلبي من بسمته اعتفس


احلى ايام لمّـتنا
لقيناها جنـّـتنا
كبرنا عشنا دنيتنا
فرح,, شقى
مرّ وحلا

تواعدنا نبي نكمل
نواعد باكرٍ أجمل
نواعد حلو أمانينا
نلاقيها بمستقبل
...قريب
يمكن حتى بعيد
المهم إنا نبي نكمل

كبرنا زياده.. تغيرنا
تغيرنا ايــه
بس الحلم..
رفض يكبر
خاف انه بيتغير

تخرجنا.. نضجنا
وتم هالحلم
سرى فينا..
يسابقنا يبي يوصل
حلف إلا يزوّجنا




بكلمة مات مافيني
بكلمة كل فرح السنين.. شقاها.. حلوها.. مرها
ذكرى واقع و آمال
تكسّر وانهدم حالي
تلخبط وانـْصدم هالبال

عجزت افهم..! كيف...؟
بكلمة منه.. بكل قسوة

يقتل أبرئ الأحلام؟؟

خلاص يا مي
انا تغيرت..لاتحاتين
عرفت الناس من هالطين
تزيّف تجذب وتلعب
بدل درسٍ.. خذت درسين

يا مي!
يقولها بقسوة.. ولا مهتم:
" يا ضاد حنّا مو متفاهمين
ماراح بعمرنا نكون
أحلى اثنين"


حسافه ياللي مع نايف
بذاك اليوم.. انا شفتك..

وأخيراً (:

عالم التدوين.. هذا العالم الغريب اللي شفت فيه وتعلمت منه واستفدت يمكن خبرة خمس أو ست سنين جدام. على فكرة! انا من زمان متابعة وفي مدونين ما يمر علي يوم ولا اثنين الا ومسيره عليهم. يعني ماحس نفسي غريبة عليكم!.
طرت على بالي فكرت إني أدون خصوصاً واني شفت هني مجتمع خاص تجمع ناسه علاقات مميزه. لقيت فيه حرية بالطرح وتقبل وتشجيع. يمكن اهوا مو بهالكمال ولكن مهما كان قدر يثبت نفسه وأهميته.

انا عن نفسي أحس للحين ماكتشفت كل ميولي وماعندي مشكلة اعرفها معاكم واتعلمها منكم واعطيكم بنفس الوقت. بس الشي اللي اكتشفته اني أحب القراءه (: قبل لما يسئلوني أقولهم لالا انا كلش الله ماعطاني حب القراءه, بس الحين تأكدلي العكس.

مابي اطول لاني بصراحه ماعرف شنو اقول على أمل اني اقدر اكون جزء من هالعالم (:

شكــراً




*نوتس: اعذروني على هالــtemplate توي مستجدة %: حسيتني قاعده اقرا مجله مو مدونتي p; بس يالله كل صغير(ن) يكبر مو؟