دانتيـل

أنا كل يوم لي موعد
مع حبك..

تخلف كل يوم الوَعـْد
و تجدّد

ترد تخلف...
وتجدّد

تعوضني بغيابك وَرْد!
على بالك بيسعدني

أنا أصلا من أسبابك
صرت أكره صباح الوَرْد

تقول الوقت يشغلني...

و أنا أحتاج من يشغل علي الوقت
يدفيني... لين فـْراشنا استـَبـْرَد

نطرت و زارني الليل

و رسم أحمر على شفافي
و نقـّش جسمي الدانيتل
و بخـّر شعري الضافي

تمنى شعري تلمـّه
يشمـّك قبل ماتـْشمـّه

نطرتك كل دقيقة سَهـْد

حتى الليل يسامرني

يصبرني على غيابك
يشوقني عليك أكثر...

وأنا أتغنى:
" مرني يا هوا مرني "

أغني لين عين الشمس
تنشّـفني و تكسـّرني

و حبك ما لمحته بـَعـَد

ولا حتى دقيقة مـَر...

و هذي قصتي كل يوم

أصبّح يم ورد أحمر
و على حسك.. تتعطـّر

ألملم شعري الأسود

أمسح باقي الأحمر

و أجرّ بخطوتي الدانتيل

وهو خايب

أبي أزعل و أتمرّد

أوصل خدّك الأسمر

وألمـّك حيل

ألمـّك حيل

تلمـني حيل

أذوق الخد

و أتنهـّد ...

قصّـة غصّـة

مطعم مزدحم. ناس تنتظر بره. ناس داخله وناس طالعه. الكل يطالع بالكل. ازعاج. موسيقى عالية. سوالف من هني و هناك. انتخابات. عرس. مانشستر يونايتد. البحر. سواين فلو. سارونه. حديقتنا. مينيو.

زياده على هذا أصوات الصحون مع الملاعق مع القلاصات مع يهال يبكون. و أشياء ثانية يكاد يكون صوتها مبهم.


الغريب أن صوت رقعة قلبها اهو الشي الوحيد اللي كان واضح بإذنها.




بقى شهر بالضبط و تكمل سنة ما شافته. ظروف دراسته بالخارج، مْنعت حتى باب الصدفة ينفتح بينهم.

"متى رجع؟". " معقولة ما لاحظت أن سيارته تحركت من مكانها على كثر ما أمر عند بيتهم!؟".

يلاعب بنت رفيجه، أو يتظاهر بهالشي. قبل لا تلاحظ أنّ عينه عليها. أكيد خايف الوله اللي مالـِيه يفضحه.


مسمر؟ سمنان؟ بس الأكيد ما طال حتى سانتيمتر واحد! هذا هو طوله.

تخنقها الثواني و هي تركض فيها. شوفته نشوى. يختمر فيها القلب و العقل.

و اللي يزيدها خنقة، إيد زوجها و كلمته:" زحمة المكان مو عاجبني. خل نروح مطعم ثاني". بدون تفكير ردت: "على هواك حبيبي :)".

ما خافت أنّ زوجها يلاحظ ارتباكها. لأنها و للحظة وحدة نست وجوده.

كان اهو الصوت اللي تارس المكان. و جافي صداه.

.
.
.
.
.
.
.
.
.
.
.
.
.
.
.
.
.
.

شاف كـِذبة دنيتي
يوم في عيني لـْمَعـَت

ما خـِدَعته بْضَحكتي

لمـَّا بـِالغصَّة طـْلـَعت

...أشوالك بعادي

بس علمني شقول
لي خلص منّا الكلام

لي انتهينا و ما بقى حتى سبب
لـخاطره نبدي سلام

لا تصر إني استمر
لا تقول لي: "تقدرين..
بس شوية صبر
ينقصج لو تحسبين"

لا تعلق لي وعودك
زينة بأعناق احتياجي
ترتجتي منها في يوم... وسط أحضانك أنام

لا يصبرني صبر
ولا يبقـّيني أمان..



بس لو تفهم عنادي
ماانتَ من يقدر عليه
لا ولا أقدر عليه
قلبي مو حكم الأيادي
قد فقدته من زمان

قد وهبته إنسان عادي
عقبها صار بحياتي
كل شي ٍ ما هقيته..


تاهت دروبي بعينه
يومها كان الهيام
بخافقي مقبل و غادي

إيه من يوم ما هويته...
زانت الدنيا بـعيوني... ولـْبـِسَت قوس القزح
عطرها صار الفرح

 

إيه أحبه من زمان
إيه صار أقصى أمنياتي

بس وش باقي كلام
لا تقول بـتقدرين
لو أحاول ما أحاول
لو تحاول ما تحاول

مو بـكيفك من تحب
لا اغتصاب ولا غصب

ولا بـكيفي لو بـحب
ومن مـَلا كلـّي فلان..

شفت شلون الكلام
ضاع منك و الأمل
ضاع فيني وخيـّبك
مات قبل يقرّبك

بس ترى لك إحترام
لكن أشوالك بعادي..


لا تقول ولا أقول
ماله أي داعي الكلام...

 

 

 

..نقط...نقط...نقط...وايد نقط... بكل شي نقط........

وايد أشياء ودي

ودي أحط راسي عالمكتب و أغفي

أكمل حلم غفوتي اللي قبل شوي

قبلها... ودي أقوم من مكاني و أروح حق هذي اللي مكتبها وراي

أوصل لي عند ويهها

وأحط ايدي على حلجها

لما أتأكد أنها ماقاعد تتنفس

و بعدين... أطفي الأغاني اللي حاطتها

مع اني ماعرف أتجرأ على أحد

اي و ودي عقب أطلع

ألاقي مطر الديمة و ماكو شمس

أوقف سيارتي و أنزل أتمشى

و المطر ينزل علي بالهدا

مع اني ماحب أستبرد

اي اي و ودي عقب أتمشى على الرمل

مع اني ماحب ريلي يحوشها تراب

اي و ودي أشم ريحة شي حلو

Miss Dior

أو خبز...

ودي ما أتكلم لمدة يوم

مع اني هذرية وماقدر أسويها

ودي أغسل ويهي بماي بـــارد

ثلج ثلج

مع ان راسي راح يصدع

ودي أروح أطق جرس بابهم
و ودي اهو يفتح الباب
علشان أقوله شي واحد بس
.
.
.
.
.
.
.....
..........
.
...
.
...........
.................
.....
......
..
.
.
.
.
.
ترى النقط اللي بالدنيا كلـــها

ما تترس الفراغ

اللي سويته لي

ودي

مع اني ما أملك . شجاعة

تعبان فيني الحيل

انا تعبان فيني الحـيل .. ماهو قادر يقـوّيني
انا مهزوزه فيني الروح .. برودك ما يهـدّيها

ترى يكفيني لو إنك .. بكل لحظه تبجـِّيني
تسمِّعني أنا آسف .. و لك كل هفوة اعـدّيها

أما تقول لي آسف .. في قلبي مابقى فيني
ولا شيٍ على شانج .. و فكرة (أبقى) سدّيها !

تكلّمني عن أتعابك .. وكل مُر ذقته مع عيني
وعن طعم الشقى وياي .. غريبة بقسوة تبديها!

تشوف الموت يطريني .. و واقف ما تعزّيني
تطالع بيدك الساعه .. تفكـِّر " أترك إيديـها؟! "

همّي "كيف من دونك؟" .. وهمّك تترك إيديني
همّك تنـْشـِف الدمعه .. و همّـي وين أودّيـها؟

خسارة تـِشهـِدَه ضعفي .. مدامك ما تقوّيني
خسارة تنتفض روحي .. ولا عارف تهدّيها

خسارة الوقت ياعمري .. و كل أحلامج سنيني
حسافة أحلى لحظاتي .. لإيـدك بيـدي أهـْدِيها

أنا إنسان

بدايتها أنا عاقل
لي القدرة على التفكير
أنا افكر
غريبة كيف من جاهل
مع الأيام أصير كبير!؟

قوّة شكّلت يومي
بـكل لحظة و دقيقة فيه
مني و منك هي أكبر
أكيد " الله "
أكيد الخالق الرحمن
جعلني إنسان

سفيه من قال:
بالصدفة.. صرت إنسان
أنا إنسان




عن ما بداخلي أقدر
على التعبير
خلقني الله مع لسان
ينطق بالحقيقة أحيان
و ساعة ينطق الباطل
مع هذا
أتم إنسان



أنا أشعر
مشاعر ترسم إنساني
غضب أسود
فرح وردي
حزن أصفر
رضى أخضر
تقلبني كثير ألوان
تغير نغمة ألحاني

أحب من بينها أبيض
يزيّن خافقٍ ينبض
بـإنساني
أنا إنسان





أنا في عالم الأحلام
غريب و منطقي تلقى
في أحلامي
وجوه الناس تشاركني
بطولاتي
تموت و تحيا و ما بين
عليم الله متى و وين

ماقدر غير أواصل
مسيراتي
و أنا إنسان




مو نسيان يميّزني
أنا النسيان لي حالة
مو أكثر
أنا أكبر من نسيان
أنا إنسان


من الأُنس إنكتب اسمي
أبعـِد وحشة الأيام
عن ناسي
و ناسي بـالمثل تفعل
توَنّس وحشة سنيني
توَنّس فرحتي و همي
أناسة تجمع الإنسان
مع الإنسان



ونهايتها أنا إنسان